Вакцините се едни од најважните алатки за заштита на здравјето на нашите деца. За жал, многу родители се соочуваат со дезинформации и митови околу вакцините, што може да ги доведе до страв и сомнеж. Во оваа статија, ќе ги разгледаме најчестите митови и вистините зад нив.
Дали се безбедни вакцините?
Вакцините се безбедни. Сите вакцини поминуваат низ ригорозни тестови за безбедност и ефикасност, вклучително и клиничко тестирање, пред да се дозволи нивна употреба. Откако ќе се стават во употреба, нивната безбедност постојано се следи. Вакцините кои не ги исполнуваат условите за квалитет и безбедност не се одобруваат и не се достапни за употреба.
Поголема е веројатноста децата да имаат сериозни последици од болест што може да се спречи со вакцина, отколку од самата вакцина. На пример, тетанус може да предизвика екстремна болка, мускулен спазам и згрутчување на крвта. Малите сипаници може да предизвикаат енцефалитис (инфекција на мозокот) и како последица слепило. Многу болести што може да се спречат со вакцина може да завршат со смртен исход. Придобивките од вакцинацијата се многу побројни од ризиците.
Дали има некаква поврзаност помеѓу вакцините и аутизмот? Не постојат научни докази кои ја поддржуваат оваа теорија. Митот за поврзаноста помеѓу вакцините и аутизмот потекнува од научно неосновано истражување од 1998 година, кое беше повлечено и демантирано. Вакцините се безбедни и не се поврзани со аутизам.
Дали природниот имунитет е подобар од вакцинацијата?
Не, oпшто земено, подобро е да се спречи болеста со вакцинирање наместо со инфекција.
Заразувањето може да им обезбеди на некои луѓе подолготрајна имунолошка реакција, но со поголем ризик. На пример, добивањето бактериска инфекција со Haemophilus influenzae тип б (Hib) може да доведе до трајна глувост, оштетување на мозокот или дури и смрт. Детските вакцини ги штитат децата од сериозни болести и компликации. Вакцините исто така ја намалуваат шансата за ширење на болеста.
Какви реакции може да се појават по примањето на вакцината? Кај некои деца може да се јават реакции како што се: умерено покачена температура, црвенило, подуеност или други локални реакции на местото на убодот, односно на местото каде што била ставена вакцината. Некои деца може да бидат плачливи, раздразливи и да се однесуваат невообичаено. Овие реакции не треба да ве загрижуваат бидејќи се минливи. Сериозните придружни појави се особено ретки. Информирајте го матичниот лекар, педијатарот или лицето кое ја дава вакцината доколку детето има некаква алергија или имало сериозна реакција на претходна вакцина.
Што ако детето има сериозно заболување, дали треба да се одложи вакцинацијата?
Повеќето деца, дури и оние со сериозни заболувања или состојби, сепак треба да се вакцинираат. Меѓутоа, постојат ретки состојби, како што се имунодепресија или сериозни алергиски реакции (на пр: анафилакса) по претходна доза на вакцина или компонента на вакцина, коишто се контраиндикации за некои вакцини.
Секогаш кога прима вакцина, детето треба да биде здраво и во добра општа состојба. Потребно е да го информирате вашиот матичен лекар (педијатар) ако вашето дете е болно или има висока температура, ако имало силна реакција на претходна вакцина, ако има некој вид алергија, и ако зема лекови што влијаат на неговиот имунитет. Овие здравствени состојби не мора секогаш да бидат причина за одложување на вакцинацијата. Лекарот ќе процени кои вакцини и кога треба да ги прими вашето дете.
Дали сепак треба да го вакцинирам детето ако веќе имало некоја од болестите што може да се спречат со вакцина? Треба да го вакцинирате вашето дете против болести кои се спречуваат со вакцина, дури и кога детето ја имало таа болест. Некои болести, како што се мали сипаници, може да бидат многу штетни и имунолошкиот систем на вашето дете да стане ранлив на други инфекции. Затоа, особено е важно да се прими вакцина за да се зајакне заштитата на телото дури и по заболувањето.
Може да ја одложам вакцинацијата? Одложување на вакцинација не се препорачува. Секојпат кога ќе одложите вакцинација, вие го зголемувате ризикот вашето дете да се зарази со сериозни болести.
Премногу е доцна да се даде вакцина ако детето не ја примило во препорачаното време
За повеќето вакцини, никогаш не е предоцна да се примат. Разговарајте со вашиот лекар за тоа како и кога вашето дете да ги прими пропуштените дози вакцини. Запомнете, кога ќе ја одложите или пропуштите вакцината, вашето дете останува подолг временски период изложено на ризик од инфекции што може да предизвикаат сериозни последици.
Следете го националниот календар за имунизација, и не ја пропуштајте препорачаната вакцина за вашето дете. Вакцините се безопасни и ефикасни. Тие помагаат да се заштитат децата од опасни болести и придонесуваат за создавање на здрава заедница. Родителите треба да се информираат од доверливи извори и да се консултираат со педијатри за да ги разберат придобивките од вакцините.
